Waziri atishiwa kuuawa

 WAZIRI wa Nchi Ofisi ya Makamu wa Rais (Mazingira), Terezya Huvisa, amesema ametishiwa kuuawa endapo ataendelea na zoezi la kubomoa nyumba za watu zilizo kwenye maeneo oevu.
Madai hayo aliyatoa jana mjini hapa, alipokuwa akizungumza na waandishi wa habari ambapo alisema amepigiwa simu za vitisho hivyo kwa lengo la kukwamisha jitihada zake za kuwashughulikia wanaovunja sheria.

Alisema baada ya kupata vitisho hivyo, aliamua kuwapigia simu lakini simu hizo hazikupatikana jambo lililomfanya kuvipuuzia vitisho hivyo.

“Sijaviripoti polisi vitisho, najua lengo lao lilikuwa kunitisha ili nisiendelee na mkakati wa kuwabomolea nyumba wale waliojenga kwa kukiuka sheria, wanajidanganya nitaendelea kuwabomolea,” alisema.

Alisema mtu yeyote mwenye jambo lenye tija na masilahi kwa taifa kamwe asingesita kumpigia simu na ikiwezekana kwenda kumuona juu ya bomoabomoa lakini waliompa vitisho hivyo ni ‘feki’.

Waziri huyo aliongeza kuwa Mwanasheria la Baraza la Taifa la Hifadhi ya Mazingira (NEMC), Heche Manchare, naye alipewa vitisho pamoja na kupigwa na watu waliokuwa wamevalia vitambaa usoni kwa lengo la kuficha sura zao.

Alibainisha kuwa tukio hilo waliripoti kwa Makamu wa Rais, Dk. Mohamed Gharib Bilal, ambaye aliwaambia walifikishe polisi lifanyiwe uchunguzi zaidi.

Aliongeza kuwa pamoja na vitisho hivyo kamwe wizara yake haitarudi nyuma katika zoezi la kuwabomolea nyumba, hoteli au wawekezaji wowote wale waliojenga kwenye maeneo oevu.

“Hili ni zoezi gumu sana linalohitaji ujasiri na umakini mkubwa sana, sisi hatutamuonea mtu yeyote, tumedhamiria kufanya kazi zetu kwa nguvu hatarudi nyuma,” alisema.

Wiki iliyopita Waziri wa Mambo ya Ndani, Emanuel Nchimbi, aliwataka viongozi na wananchi wote wanaopata vitisho kuwasiliana na polisi ili hatua zichukuliwe.

Katika hatua nyingine, serikali imeeleza kupata hasara ya sh bilioni 50 kwenye utekelezaji wa zoezi la bomoabomoa katika fukwe za kawe na mbezi jijini Dar es Salaam.

Waziri Huvisa, alisema kuwa kiasi hicho cha fedha ambacho serikali imekitumia ni kikubwa sana na kitalipwa na wamiliki wa nyumba hizo ambao walijenga kinyume cha sheria na watazigawanya kwa viwango mbalimbali kutokana na kila nyumba ilipokuwa imefikia.

Alisema kuwa wizaya yake ilishirikiana na Maliasili na Utalii, Wizara ya Ardhi, Nyumba na Maendeleo ya Makazi na Manispaa ya Kinondoni ambapo jumla ya nyumba saba na uzio nane zilibomolewa na ujenzi uliokuwa unaendelea kwenye mkondo wa mto umebomolewa.

Alisema kuwa ubomoaji huu ni utekelezaji wa sheria ya mwaka 2004 kutokana na wananchi hao kukaidi na kutokutekelezwa kwa maagizo mbalimbali ya kutoendelea na ujenzi yaliyotolewa kwa wahusika.

“Nawataka wale wote waliojenga na wanaoendelea kujenga kwenye vyanzo vya maji, kando kando ya bahari, maziwa, mito na mabwawa na misitu inayolindwa kisheria kuondoka mara moja na endapo watakiuka maagizo hayo hatua kali za kisheria zitachukuliwa dhidi yao,” alisema waziri huyo.

Alifafanua kuwa hatua zitakazochukuliwa dhidi yao moja wapo ni kuwabomolea nyumba zao na kuwaondoa katika maeneo hayo na kwamba watatakiwa kulipia gharama zote zitakazohusu ubomoji huo.

Waziri alisema kuwa agizo hilo pia linawahusu wakulima na wafugaji wanaofanya shughuli zao katika vyanzo vya maji.
Chanzo: Tanzania Daima

Mkurugenzi TANESCO atikisa

SIKU moja baada ya Bodi ya Wakurugenzi ya Shirika la Umeme Tanzania (TANESCO), kumsimamisha kazi Mkurugenzi Mtendaji wa shirika hilo, William Mhando, na wenzake watatu kwa tuhuma za ubadhirifu na matumizi mabaya ya madaraka, siri nzito imefichuka kuwa ni janja za serikali kutaka kuficha udhaifu na uzembe wake katika kuliwezesha shirika hilo.

Mhando na Naibu Mkurugenzi Mtendaji wa TANESCO, Robert Shemhilu, Ofisa Mkuu wa Fedha, Lusekelo Kassanga na meneja Mwandamizi Ununuzi, Harun Matambo, walisimamishwa na bodi hiyo chini ya Mwenyekiti wake, Jeneralai mstaafu, Robert Mboma ili kupisha uchunguzi wa tuhuma dhidi yao.

Hata hivyo Tanzania Daima limedokezwa kuwa mkurugenzi huyo ametolewa kafara kutokana na kutokuwa na mahusiano mazuri kiutendaji na Katibu Mkuu wa Wizara ya Nishati na Madini, Eliakim Maswi, lakini na vilevile katibu mkuu huyo anatumia udhaifu wa serikali kwa TANESCO kumwadhibu ili kuepusha mjadala mzito wakati hotuba ya bajeti yao itakaposomwa bungeni hivi karibuni.

Inasemekana sababu inayotolewa na Katibu Mkuu ni kwamba Mhando alimdharau kwa kutompa taarifa kabla ya TANESCO kutangaza mgawo wa umeme wa hivi karibuni. Kwa mantiki hiyo, akamlima Mhando barua akisema anahujumu shirika. Hata hivyo, wananchi na watumishi wa TANESCO wanajua kuwa anayehujumu TANESCO ni serikali, ambayo inalinyima shirika hilo pesa ilizoahidi kwa ajili ya miradi ya uzalishaji na usambazaji wa umeme, na kulizuia shirika hilo kuuza umeme kwa faida, kwa sababu za kisiasa.

Inasemekana hatua dhidi ya Mhando inatokana na woga wa waziri na katibu mkuu juu ya mjadala mkali unaotarajiwa kuibuka bungeni wakati wa kujadili bajeti ya wizara yao. Mhando anatolewa kafara kisiasa, lakini taarifa zinasema naye amejibu barua ya katibu mkuu kueleza jinsi asivyohujumu shirika hilo. Habari zaidi baadaye.

Katika barua ya Maswi kwa Mhando yenye Kumb.Na. SAB. 270/ 286/01/2 ya Julai 12, mwaka huu, anasema: “Nimesikitishwa na kitendo chako cha kuanza mgawo wa umeme bila kupata kibali cha maandishi kutoka kwangu kama nilivyokueleza katika barua yangu niliyoambatanisha.”

Maswi anaongeza: “Hiyo siyo tu ni dharau bali inaonyesha kuwa mgawo huo wa umeme unafanywa kwa makusudi kwa lengo la kuihujumu serikali. Aidha, ukiwa kama kiongozi mkuu wa shirika, unaonekana umeshindwa kutekeleza majukumu yako ya kusimamia shughuli za shirika inavyostahili.
“Kwa barua hii unipe maelezo kwa nini uliamua mwenyewe kuanza mgawo wa umeme bila kunifahamisha kama inavyotarajiwa, kwa makusudi kabisa uliamua kuanzisha mgawo mikoa yote bila sababu ya msingi ilhali ukijua ni wakati wa Bunge na ili serikali ishambuliwe,” ilisomeka barua hiyo.

Hata hivyo, katika barua yake ya utetezi Mhando anakataa kuhusika na hujuma huku akieleza bayana kile kilichotokea hadi kusababisha mgawo na kwamba hata Mwenyekiti wa Bodi ya Wakurugenzi alipewa taarifa juu ya tatizo hilo.

“Taarifa hii nilimpa pia mwenyekiti wa Bodi ya Wakurugenzi wa Shirika. Hali hii ilijitokeza kutokana na ukweli kwamba vituo vya kuzalisha umeme vya IPTL na Symbion Dodoma havikuwa na mafuta ya kutosha kuzalisha umeme, na vile vile kulikuwa na upungufu wa gesi asili katika vito vya TANESCO,” alisema Mhando katika barua yake.

Anakataa kuwa hajashindwa kufanya kazi yake hiyo licha ya kuifanya kwenye mazingira yenye changamoto kubwa. “Serikali ingeidhamini TANESCO kupata mkopo wa sh bilioni 408 mapema iwezekanavyo, kuondoa kodi kwenye mafuta yanayotumika kufua umeme na kupata ruzuku ya sh bilioni 80 toka serikalini ifikapo Julai mwaka huu matatizo ya umeme yangelikuwa historia!”

Mhando anaweka wazi kuwa mkopo huo wa sh bilioni 408 ambao ulitegemewa kupatikana mapema tangu mwishoni mwa 2011 mpaka sasa haujapatikana kutokana na ucheleweshaji wa dhamana ya serikali na msamaha wa kodi kwenye mafuta yanayotumika kufua umeme pamoja na ruzuku ya sh bilioni 80 toka serikalini haijapatikana kama ilivyoahidiwa.

Ni katika mazingira hayo wadadisi wa mambo wanaona kama serikali inataka kufunika kombe la kushindwa kutimiza wajibu wake kwa shirika hilo na hivyo kumbebesha lawama Mahando ili isiadhibiwe na wabunge.

Kufuatia utata huo wa kusimamishwa kwa vigogo hao, Mwenyekiti wa Kamati ya Kudumu ya Bunge ya Hesabu za Mashirika ya Umma (POAC), Kabwe Zitto, aliliambia gazeti hili jana kuwa wameita kikao cha kamati na kuiita bodi ya TANESCO ili ijieleze na vile vile watakuwepo Mkaguzi Mkuu wa Hesabu za Serikali, Ludovic Uttoh na Mamlaka ya Manunuzi ya Umma (PPRA).

“Nitatoa taarifa baada ya kikao. Tunataka uwajibikaji lakini hatutaki uonevu, nimeagiza mwenyekiti wa bodi ya TANESCO aje kujieleza kwenye kamati kuhusu tuhuma hizo,” alisema Zitto.

Naye waziri kivuli wa Nishati na Madini, John Mnyika, alisema kuwa kusimamishwa kwa Mhando na watendaji wengine wa shirika hilo ni mbinu ya serikali ya kuficha udhaifu na uzembe unaoikabili.

Katika taarifa yake kwa vyombo vya habari jana, Mnyika alisema hali hiyo inachagizwa na suala zima la ufisadi hali inayotishia nchi kurudi katika mgawo wa umeme kama inavyodhihirika hivi sasa.

Alisema taarifa za utendaji wa TANESCO kuhusu mpango wa dharura wa umeme zimekuwa zikijadiliwa mara kwa mara kwenye vikao vya wizara hiyo hata baraza la mawaziri bila kuchukuliwa hatua muafaka.

“Hii ni kauli rasmi kama waziri kivuli kitendo cha kumsimamisha Mhando na wenzake ni kumtoa kafara ya kuficha udhaifu na uzembe wa serikali juu ya tishio hili la nchi kurejea katika mgawo,” ilisema sehemu ya taarifa hiyo.

Aliitaka serikali kutoa kauli ya kwa nini waziri na naibu wake walitoa taarifa potofu bungeni kuwa hakuna tishio la mgawo wa umeme, na juu ya mkakati wao aliouita ni dhaifu waliokuwa wakiufanya kupunguza mgawo katika kipindi cha Bunge ili kuficha udhaifu na uzembe uliokithiri.
Chanzo: Tanzania Daima

Mhando wa Tanesco ‘asimamishwa’

 MKURUGENZI Mkuu Mtendaji wa Shirika la Umeme Tanzania (Tanesco), Mhandisi William Mhando amesimamishwa kazi na Bodi ya Wakurugenzi ya shirika hilo kuanzia jana.Kwa  mujibu wa taarifa iliyotolewa na Bodi ya Wakurugenzi  na kusainiwa na Mwenyekiti wake, Jenerali Mstaafu Robert Mboma, Mhando amesimamishwa kazi pamoja na watendaji wakuu wengine wa Tanesco ili kupisha uchunguzi wa tuhuma za ubadhirifu na matumizi mabaya ya madaraka.

Viongozi wengine wa Tanesco waliosimamishwa  kazi ni Naibu Mkurugenzi Mtendaji Huduma za Shirika, Robert Shemhilu, Ofisa Mkuu wa Fedha Lusekelo Kassanga na Meneja Mwandamizi, Manunuzi Harun Mattambo.

Hata hivyo, Mhando alisema kupitia Shirika la Utangazaji Tanzania (TBC 1) jana kuwa hana taarifa zozote kuhusiana na kusimamishwa kwake.

Ingawa  taarifa hiyo ya Mboma haikueleza nani anakaimu nafasi iliyoachwa wazi na Mhando, lakini habari tulizopata kutoka vyanzo vyetu ndani ya Wizara ya Nishati na Madini na Tanesco zinasema Kaimu Mkurugenzi Mkuu Mtendaji atakuwa Felschami Mramba ambaye ni Mkurugenzi Mtendaji wa Masoko na Usambazaji wa Tanesco.

Hatua hiyo imetangazwa jana jijini Dar es Salaam kufuatia  kikao cha dharura cha Bodi ya Wakurugenzi ya Tanesco kilichofanyika  Julai 13 mwaka huu, ambacho kilijadili tuhuma mbalimbali dhidi ya menejimenti ya Tanesco.

Taarifa hiyo fupi imeeleza  kuwa tuhuma dhidi ya Mhandisi Mhando ni nzito hivyo ni vyema zifanyiwe uchunguzi huru na wa kina.

“Hivyo, Bodi  iliazimia pamoja na mambo mengine kama ifuatavyo: Uchunguzi wa tuhuma hizo uanze mara moja kwa kutumia uchunguzi huru na kumsimamisha kazi Mkurugenzi Mtendaji wa Tanesco, Mhandisi William Mhando ili kupisha uchunguzi huo na kwa kuzingatia matakwa ya sheria za kazi nchini,” inaeleza sehemu ya taarifa hiyo.

Mboma alibainisha bodi yake kufanya kikao kingine cha dharura jana Julai 14, na kuamua kuwasimamisha kazi watendaji hao mara moja ili kupisha uchunguzi huo.

 “Pamoja na uamuzi huo, Bodi imechukua hatua stahiki za kuhakikisha kwamba shughuli za utendaji na uendeshaji wa Tanesco zinaendelea kama kawaida,” imesema taarifa hiyo.

Awali saa 11 jioni jana waandishi wa habari walijazana katika Ofisi ya Wizara ya Nishati na Madini iliyopo Mtaa wa Ohio, ambapo hawakufanikiwa  kuwaona wakurugenzi hao waliokuwa kwenye kikao huku wakitakiwa kuondoka eneo hilo na kusubiri kwa mbali.

Waandishi hao walilazimika kusubiri kwa takriban saa nzima ndipo alipotokea Ofisa Habari wa Wizara ya Nishati na Madini aliyetambuliwa kwa jina la Fadhili Kileo na kugawa nakala ya taarifa ya kikao hicho huku wakurugenzi hao wakipanda magari yao na kuondoka bila ya kuzungumza  na waandishi hao hali iliyowakera waandishi.

 “Jamani naomba mtusamehe sana, hii siyo kawaida yetu, imekuwa ni dharura tu ndiyo maana mnaona wakurugenzi wanaondoka,” alisema Kileo akiwasihi waandishi wa habari waliokuwa wakilalamika.

Wakati hayo yakiendelea, Katibu Mkuu wa wizara hiyo, Eliakim Maswi naye alikataa kuzungumza na waandishi wa habari akisema kuwa hahusiki.

“Hapana mimi sihusiki, nendeni kwa hao viongozi waliokuwa kwenye kikao,” alisema  Maswi.
Mhando aliteuliwa kuwa Mkurugenzi wa Tanesco kuanzia tarehe 1 Juni, 2010.

Baada ya uteuzi huo, Mhando alisema atahakikisha wateja wote wa Tanesco wanakuwa na mita za Luku.

Kabla ya uteuzi huo, Mhando alikuwa ni Meneja Mkuu Usambazaji Umeme na Masoko katika shirika hilo.

Mhando alichukua nafasi ya aliyekuwa Mkurugenzi wa shirika hilo, Dk Idris Rashid ambaye alimaliza muda wake wa uongozi.

Wasifu wa Mhando

 Mhando aliajiriwa na Tanesco mwezi Oktoba mwaka 1987 kama Mhandisi wa Umeme na baadaye alipandishwa na kuwa Mhandisi katika njia za umeme. Mwaka 1990 hadi 1992 aliteuliwa kuwa Meneja wa Tanesco Mkoa wa Singida.

 Mwaka 1992 hadi 1994 alikuwa Meneja wa Mkoa wa Tanesco, Mkoa wa Mbeya. Alipandishwa cheo mwaka 1995 na kuwa Mkurugenzi wa Kanda ya Kusini Magharibi hadi mwaka 1999.

 Ana elimu ya Shahada ya Uzamili (Masters) katika masuala ya umeme aliyoipata mjini Havana nchini Cuba mwaka 1987, pamoja na mafunzo mengine aliyoyapata katika vyuo mbalimbali ndani na nje ya nchi.

Kwa muda mrefu Tanesco imekuwa katika matatizo mbalimbali ya kiutendaji na utoaji huduma yaliyosababisha taifa kuingia katika mgawo wa umeme na kudhoofisha maendeleo na ukuaji wa uchumi.

Matatizo hayo ni pamoja na uchakavu wa mitambo ya Tanesco, hujuma za miundombinu na kuingiwa kwa mikataba mibovu.

Akijibu maswali ya waandishi wa habari katika mkutano wa kutoa ufafanuzi juu ya taarifa iliyotolewa na Kamati ya Hesabu za Mashirika ya Umma(POAC), kuwa kuna ubadhirifu ndani ya Tanesco  Mei 7, mwaka huu, Mhando alisema ikigundulika kuna ubadhirifu wowote uliofanyika katika shirika hilo kutokana na Ripoti ya Mdhibiti na Mkaguzi Mkuu wa Hesabu za Serikali(CAG) basi atakuwa tayari kujiuzulu.


Taarifa ya POAC ilisema shirika hilo lilifanya ununuzi wa kati ya Sh300 bilioni hadi Sh600 bilioni lakini Mhando alisema kuwa si kweli.

"Kama nimekosea niko tayari kujiuzulu na mwajiri akiamua kunihamisha sina tatizo na ninawaambia mimi sina miaka miwili kazini na shirika linapata hati safi hilo mwelewe na mliseme," alisema Mhando.
Chanzo: Mwananchi

Mdee arusha kombora

 KAMBI ya upinzani bungeni imeitaka serikali kuyarejesha mashamba yaliyoshindwa kuendelezwa na wawekezaji na yagawiwe kwa wananchi wenye kuyahitaji.

Miongoni mwa wawekezaji hao ni Chavda Group, aliyeuziwa mashamba saba yenye ukubwa wa hekta  25,000, katika maeneo tofauti hapa nchini, ambapo mwaka 1993 alizitumia hati zake kujipatia mkopo wa dola milioni tatu.

Kauli hiyo imetolewa jana bungeni na Waziri Kivuli wa Wizara ya Ardhi, Nyumba na Maendeleo ya Makazi, Halima Mdee, alipokuwa akitoa hotuba ya kambi yake kuhusu mapitio ya utekelezaji wa bajeti ya mwaka 2012/2013.

Mdee alisema  familia ya Chavda iliahidi kufufua  mashamba ya mkonge Tanga ndani ya miaka 10, na kupata dola milioni 42 lakini walipopata fedha hizo hawakufanya lolote kwenye mashamba hayo na hakuna hatua zilizochukuliwa dhidi yao.

”Tuwachukulie wawekezaji wa aina hii kama ni ’waporaji’ na hawana tofauti na majambazi wanaoiba benki kwa kutumia nguvu,” alisema Mdee.

Aliongeza kuwa wanaitaka serikali kuyarejesha  serikalini bure pasi na fidia mashamba hayo kwa ajili ya kutafuta wawekezaji wengine wenye mtaji wa kutosha watakaoyaendeleza.

Alibainisha kuwa mashamba ambayo tayari yana wakulima wadogo wadogo wanaoendesha shughuli zao za kilimo, serikali ipange utaratibu wa kuwamilikisha wananchi maeneo husika ili kuondokana na ile dhana ya ’uvamizi’ au kukodishwa ardhi kwa ajili ya kilimo. Zoezi hili lazima lifanywe kwa uwazi ili kuepuka udanganyifu uliotokea  katika maeneo mengine ya nchi  ambapo vigogo na watu wenye nafasi  zao walijitwalia ardhi wakijifanya na wao ni sehemu ya wanakijiji!

Kampuni ya uwindaji yatafuta madini
Kambi hiyo imesema  Tanzania imegeuzwa shamba la bibi na kikundi cha mafisadi ambapo imeshuhudia mkataba ilioingiwa baina  ya kampuni  za Uranium  Resourses  PLC, Western Metals Limited  na Game Frontiers  of Tanzania Limited.

Mkataba ambao umetengenezwa na Kampuni ya Kitanzania ya REX ATTORNEYS Machi 23, 2007, unaihusu kampuni ya uwindaji, inayofahamika kwa jina la Game Frontiers  of Tanzania Limited  inayomilikiwa na Mohsin M. Abdallah  na Nargis M. Abdallah.

Mdee alisema kampuni hiyo ya uwindaji, imeingia mkataba na kampuni mbili za kigeni, za kufanya utafiti wa uchimbaji wa madini ya uranium katika Kijiji cha Mbarang’andu.

Alisema sheria za uhifadhi wa wanyamapori ya mwaka 1974 (Sheria ya zamani) na Sheria mpya The wildlife Conservation Act, Act no 5 of 2009. Sheria hizi zinamruhusu mtu aliye na leseni ya uwindaji, kuwinda wanyama tu.

Aliongeza kuwa kambi hiyo inaitaka serikali ilieleze Bunge uhalali wa mkataba kati ya Game Frontiers na Uranium Resourses PLC na Western Metals.

Mapema akiwasilisha bajeti yake, Waziri wa Ardhi, Profesa Anna Tibaijuka, alisema kuwa wanatarajia kutumia sh bilioni 60 kutoka katika bajeti yao sh bilioni 101.7 ilizoziomba mwaka 2012/2013 kuendeleza mji mpya wa Kigamboni.

Profesa Tibaijuka alisema mradi wa ujenzi wa mji mpya wa Kigamboni utahitaji sh trilioni 11.6 mpaka kukamilika kwake na serikali imejipanga kutafuta kiasi hicho cha fedha.

Alisema sh bilioni 60 walizotenga kwa mwaka 2012/2013 ni sawa na asilimia 10 ya fedha zote zinazohitajika katika mradi huo na sh bilioni 605  serikali itatumia mbinu za kisasa kuzitafuta.

Aliziagiza halmashauri za wilaya zote nchini kusimamia ipasavyo masuala ya ardhi kwa kufuata sheria ikiwa ni pamoja na kuhakikisha wananchi wanaokaidi mipango miji, wanaovamia maeneo ya wazi na kujenga kwenye fukwe hawalipwi fidia.
Chanzo: Tanzania Daima

Great degrees for adult students

It's never too late to learn something new. And for older adults looking for a change, going back to school may be a smart decision.

Why? Because "a return to school keeps older workers up-to-date and relevant," says Debra Davenport, founder and executive director of The Davenport Institute, a certified firm that advises on career and lifestyle changes.

In fact, community colleges are now creating or expanding campus programs to engage the 50 plus population in learning, training, or re-training. This is in large part thanks to the Plus 50 Initiative, a program created in 2008 by the American Association of Community Colleges.

And it makes sense that community colleges are targeting older students, with the number of students age 35 or older projected to grow 22 percent between 2008 and 2019, according to the National Center for Education Statistics.

What's driving older students back to school? "Many of the [older] students returning to community colleges are seeking skill updating," says Mary Sue Vickers, director of the Plus 50 Initiative.

Click to Find the Right Degree Program.

Vickers adds that older students may return because they've discovered they need to work longer given the recent recession, they lost a job, or they want to finish a degree program to remain competitive in the workplace.

But for older students, the hardest part about going back to school may be deciding what degree to pursue. However, Davenport says that popular career choices among her older clients include psychology, counseling, social work, nursing, consulting, coaching, and teaching, among many others.
Read more.......

Thabeet asaini miaka miwili Thunder

 NYOTA wa kimataifa wa mchezo wa kikapu, Hasheem Thabeet wa Tanzania, ambaye ameshindwa kung'ara kwenye Ligi ya NBA tangu aliposhika nafasi ya pili kwenye mashindano ya vyuo mwaka 2009, amesaini mkataba wa miaka miwili kuichezea timu ya Oklahoma City Thunder, limeripoti gazeti la Daily Oklahoman.

Thabeet alitasaini rasmi mkataba huo mpya Julai 11 mwaka huu.Makubaliano ya mkataba huo hayajawekwa wazi, lakini taarifa zinasema kuwa ni mkataba wa kudumu wa misimu yote miwili.
Kwa mujibu wa Oklahoman, Thabeet atalipwa mshahara  wa dola 880,000 (Sh1.3 Bilioni) katika mwaka wake wa kwanza wa mkataba.

Gazeti hilo limeeleza kwamba, mshahara huyo ni mdogo zaidi kulipwa kwenye ligi.Thabeet mwenye urefu wa futi 7.3, anajiunga na timu hiyo mpya, ikiwa ni ya nne kwake katika misimu minne ya kucheza tangu mwaka 2009.

James Harden, Tyreke Evans, Stephen Curry, Jrue Holiday, Brandon Jennings na Ricky Rubio ni miongoni mwa wachezaji waliosajiliwa toka kwenye mashindano ya vyuo baada ya Thabeet mwaka 2009.Akiwa amecheza michezo 135 ya Ligi Kuu ya Kipapu Marekani (NBA), Thabeet  ana wastani wa pointi 2.2 ya kucheza mipira inayorudi na pointi 0.9 ya kuzuia.

Wastani huo ni sawa pointi 1.8 na 2.1 kwa mipira inayorudi katika mechi 20, lakini kwa zile tano ya mwisho akiwa na timu ya Houston, na michezo 15 akiwa na timu ya Portland.
Chanzo: Mwananchi

JK ashitakiwe - Lissu

“Mheshimiwa Spika, katika mazingira ambayo upande mmoja wa Muungano si tu una serikali kamili, Bunge kamili, Mahakama kamili, wimbo wa taifa, bendera ya taifa, na sasa una nchi kamili yenye mipaka na eneo la bahari linalojulikana, una majeshi yake na Amiri Jeshi Mkuu wake, huu ni muda mzuri kwa Serikali ya Tanganyika kuzaliwa upya,”...
KAMBI ya upnzani Bungeni imelitaka Bunge kutumia mamlaka yake kuchukua hatua za kumshitaki Rais Jakaya Kikwete kwa mujibu wa ibara ya 46A ya Katiba kwa kushindwa kuihifadhi, kuilinda na kuitetea Katiba ya Muungano kama kiapo cha kazi yake kinavyomtaka.

Kauli hiyo ilitolewa jana bungeni  na Msemaji rasmi wa Kambi ya Upinzani, Ofisi ya Makamu wa Rais (Muungano), Tundu Lissu wakati akichangia hoja ya makadirio ya matumizi na mapato ya Ofisi ya Makamu wa Rais.

Lissu alisisitiza kuwa Rais Kikwete ameshindwa kuihifadhi, kuitetea na kuilinda Katiba ya Muungano kwa kuiacha na kuiruhusu  Zanzibar kufanya mabadiliko ya Katiba yaliyovunja kwa kiasi kikubwa makubaliano ya Muungano.

Alisema Kikwete si tu kwamba aliponzwa  na hofu  ya kuwaudhi Wazanzibari, lakini pia alishiriki katika kufanya mabadiliko ya Katiba ya Zanzibar ambayo inavunja makubaliano ya Katiba ya Muungano.

Kwa mujibu wa Lissu, mabadiliko ya Katiba ya sasa ya Zanzibar imeweka vifungu ambavyo  vinakiuka misingi mikuu ya makubaliano ya Muungano na Sheria ya Muungano na haviwezi kubadilishwa bila kura ya maoni ya Wazanzibari.

“Kwa maneno mengine, kwa mujibu wa Katiba ya sasa ya Zanzibar, masuala kama Tanzania ni nchi moja au la, majeshi ya ulinzi, polisi, n.k. ambayo yamekuwa mambo ya Muungano kwa mujibu wa makubaliano ya Muungano na Sheria ya Muungano si mambo ya Muungano tena hadi hapo wananchi wa Zanzibar watakapoamua kwa kura ya maoni  kuyarudisha kwa mamlaka ya Muungano. Huku, Mheshimiwa Spika, ni kutangaza uhuru wa Zanzibar bila kutaja neno uhuru! Huku ni kuua Muungano bila kukiri hadharani!

“Mheshimiwa Spika, kwa mtazamo wa Katiba ya sasa ya Zanzibar, hatuna tena nchi moja inayozungumzwa katika Katiba ya Muungano bali tuna nchi mbili. Kwa mtazamo huo huo, masuala ya ulinzi na usalama, polisi, n.k. si tena Mambo ya Muungano kwa sababu sasa kila nchi ina majeshi yake na kila moja ina Amiri Jeshi Mkuu wake,” alisema.
Lissu alisema kwa sasa kuna marais wawili, wakuu wa nchi wawili na viongozi wa serikali wawili, akidai mambo haya yote yanakiuka moja kwa moja makubaliano ya Muungano na Sheria ya Muungano.

“Kwa upande mwingine, kwa mtazamo wa Katiba ya sasa ya Zanzibar, Rais wa Muungano hana tena mamlaka ya kugawa mikoa na wilaya kwa upande wa Zanzibar, na wala hawezi kumshauri tena Rais wa Zanzibar anapoteua wakuu wa mikoa wa Tanzania Zanzibar.

“Aidha, Mahakama ya Rufani ya Tanzania  licha ya kuwa moja ya mambo ya Muungano kwa mujibu wa Katiba ya Muungano, haina tena mamlaka ya kusikiliza na kuamua rufaa zinazohusu haki za msingi na uhuru wa mtu binafsi zinazotoka Zanzibar,” alisema.

Lissu  alisema wakati Zanzibar ikifanya mabadilko ya Katiba, Rais Kikwete na Chama cha Mapinduzi (CCM), walikuwepo lakini hawakuchukua hatua zozote kuzuia na kuilinda Katiba ya Muungano kama alivyowahi kufanya Baba wa Taifa, Mwalimu Nyerere.

“Kwa wale wanaodai kwamba wana-Uamsho wanataka kuvunja Muungano kwa sababu tu ya kudai kura ya maoni, tunaomba tuwakumbushe yafuatayo: “Kwanza, kwa mujibu wa Baba wa Taifa katika kitabu chake Uongozi Wetu na Hatima ya Tanzania: ‘Huko nyuma baadhi ya viongozi wa Zanzibar wapinzani wa Muungano wamewahi kudai tufanye referendum kwa Zanzibar kuhusu Muungano.

Tukakataa kwa sababu safi kabisa.’ Hapa Mwalimu alikuwa anamzungumzia aliyekuwa Rais wa Zanzibar Alhaj Aboud Jumbe, Waziri Kiongozi Ramadhani Haji Faki na Mwanasheria Mkuu wa Zanzibar Bashir Ebassuah Kwaw Swanzy waliong’olewa madarakani mwaka 1984 baada ya ‘kuchafuka kwa hali ya hewa ya kisiasa,’’’ alisema.

Kwa mujibu wa Lissu, kifungu cha 5(1)(a)(iii) na (iv) cha Sheria ya Muungano kinataja ‘ulinzi’ na ‘polisi’ kama sehemu ya mambo kumi na moja ya Muungano. Na hivyo ndivyo inavyosema aya ya (iv)(c) na (d) ya Makubaliano ya Muungano.
“Hata hivyo, Mheshimiwa Spika, katika kile kinachoonekana kama hojaji kubwa ya msingi huu wa Makubaliano ya Muungano na Sheria ya Muungano, ibara ya 121 ya Katiba ya sasa ya Zanzibar imeunda majeshi ya Zanzibar inayoyaita ‘Idara Maalum.’

“Mheshimiwa Spika, si tu kwamba Katiba mpya ya Zanzibar inaanzisha majeshi bali pia inamfanya Rais wa Zanzibar kuwa Amiri Jeshi Mkuu wa majeshi hayo. Kwa mujibu wa ibara ya 123(1) ya Katiba hiyo, “Rais atakuwa Kamanda Mkuu wa Idara Maalumu na atakuwa na uwezo wa kufanya chochote kile anachohisi, kwa maslahi ya Taifa (la Zanzibar), kinafaa.” Aidha, kwa mujibu wa ibara ya 123(2), mamlaka ya Rais wa Zanzibar chini ya ibara ndogo ya (1) yanaingiza “... uwezo wa kutoa amri ya kufanya shughuli yoyote inayohusiana na idara hiyo kwa manufaa ya taifa.

“Kwa maoni ya Kambi Rasmi ya Upinzani Bungeni, haya ni mamlaka ya kutangaza au kuendesha vita ambayo, kwa mujibu wa ibara ya 44(1) ya Katiba ya Muungano, ni mamlaka pekee ya Rais wa Jamhuri ya Muungano,” alisema.
Alisema katika mazingira ya sasa ambapo upande mmoja wa Muungano umejitangazia uhuru  ni wakati muafaka kuanzishwa tena kwa Serikali ya Tanganyika.

“Mheshimiwa Spika, katika mazingira ambayo upande mmoja wa Muungano si tu una Serikali kamili, Bunge kamili, Mahakama kamili, wimbo wa taifa, bendera ya taifa, na sasa una nchi kamili yenye mipaka na eneo la bahari linalojulikana, una majeshi yake na Amiri Jeshi Mkuu wake, huu ni muda mzuri kwa Serikali ya Tanganyika kuzaliwa upya,” alisema.

“Katika mazingira kama haya, Mheshimiwa Spika, upande wa pili wa Muungano unatakiwa kuwa na vitu vyote hivyo pia ili uweze kujadiliana na upande wa kwanza katika hali ya usawa.

“Huu ni wakati wa kurudishwa tena kwa Serikali ya Tanganyika kama ilivyopendekezwa na Tume ya Rais ya Chama Kimoja au Vyama vingi mwaka 1991 na Tume ya Kissanga mwaka 1998, na kama ilivyopendekezwa na kundi la wabunge 55 wa Bunge hili tukufu na kuungwa mkono na Serikali ya Rais Ali Hassan Mwinyi kabla ya hoja hiyo kutunguliwa na Baba wa Taifa mwaka 1993!” alisema.

Alisema CHADEMA inaungana na  wote  wanaoendelea kudai kuitishwa kura ya maoni ya wananchi ili waweze kuamua mustakabali wa taifa kwani kuendelea na kiini macho cha Muungano wakati serikali zote mbili na chama tawala cha CCM wanauvunja kivitendo, kutaliweka taifa  kwenye njia panda.

Alisema kambi rasmi ya upinzani Bungeni inataka Watanzania waamue, kwa kura ya maoni, kama bado wanataka kuendelea na Muungano na kama jibu lao ni ndio, ni muundo gani wa Muungano wanautaka.
“Kama, kwa busara zao, wataamua kwamba nusu karne ya Muungano inatosha basi itakuwa afadhali kwenda njia ya Czechoslovakia ya zamani kuliko kwenda njia ya Yugoslavia ya zamani, au Ethiopia na Eritrea au Sudan na Sudan Kusini,” alisema.

Mwanasheria Mkuu ampinga
Kuhusu madai ya Lissu kutaka Rais Kikwete ashitakiwe kwa kuvunja Katiba, Mwanasheria Mkuu wa Serikali, Jaji Frederick Werema, alimjibu akifafanua kuwa si kweli kwani hakuna sheria yoyote iliyovunjwa.

“Nikiri kuwa tamko hilo la kuridhia makubaliano ya Muungano sijaliona lakini Aprili 25 mwaka 1964 Baraza la Mapinduzi la Zanzibar lilipitisha makubaliano hayo na baadaye Bunge liliyaidhinisha,” alisema.

Jaji Werema alifafanua kuwa hata kama hakuona makubaliano hayo hiyo haiwezi ikawa hoja ya kusema Muungano haupo, akibainisha kuwa kwa mujibu wa sheria za kimataifa kitendo cha nchi kuonesha dalili ni kwamba imekubaliana.
Alisema kuwa wengi wanaohoji kasoro za Muungano katika maeneo mengi nchini si kwamba wanaupinga bali wanataka mkataba wa makubaliano uwekwe wazi, jambo alilokiri kuwa linakosekana.

Kuhusu mabadiliko ya hivi karibuni ya Katiba ya Zanzibar ambayo Lissu alidai yamevunja Katiba ya Jamhuri ya Muungano wa Tanzania kwa kuitamka Zanzibar kuwa ni nchi, Jaji Werema alisema hayajavunja Katiba.

“Mabadiliko yaliyofanywa na Baraza la Mapinduzi la Zanzibar hayajavunja Katiba ya Muungano, Zanzibar kweli ni nchi, si dola wala Zanzibar si Jamhuri lakini ni nchi maana bila hivyo hakuna Muungano,” alisema Jaji Werema.

Chiligati anena

Akijadili hotuba hiyo, Mbunge wa Manyoni Mashariki, John Chiligati, alisema hoja ya Lissu ya kutaka kufufua serikali ya Tanganyika ni kutangaza kuua Muungano.

Chiligati ambaye alikwepa kujadili hoja ya kutaka Bunge lichukue nafasi yake kumshitaki Rais Kikwete, alisema hata kama italazimika kuundwa kwa serikali ya Tanganyika, bado itakuwa ni balaa jingine kiuchumi kwani uwezo wa kiuchumi wa kuendesha serikali tatu haupo na itakuwa mzigo mkubwa.

“Kufufua Tanganyika na Utanganyika ni kurudi nyuma na kuvunja Muungano na Watanzania wenye nia njema lazima tuukatae,” alisema.

Chiligati alisema muungano wa nchi mbili ndiyo zimelifikisha taifa hapa ilipo, na akakumbusha namna ambavyo baadhi ya mataifa yaliyoungana yalivyosambaratika kwa kuwa hawakuwa na muungano wa aina ya Tanzania.
Chanzo: Tanzania Daima

Dk. Ulimboka aitesa serikali

 SIKU chache baada ya Mkuu wa Upelelezi Kanda Maalumu ya Dar es Salaam, Ahmed Msangi, kudaiwa kuhusika kwenye sakata la kutekwa, kuteswa na kuumizwa kwa Mwenyekiti wa Jumuiya ya Madaktari, Dk. Steven Ulimboka, imeelezwa kuwa ofisa huyo amewekewa ulinzi mkali.

Habari za ndani ya jeshi hilo zinasema kuwa ofisa huyo anaishi kwa mashaka kutokana na tuhuma nzito aliyotupiwa, hatua iliyowafanya wakuu wake kumpa walinzi wawili wa kulinda usalama wake wakati huu ambapo uchunguzi unaendelea chini ya tume maalumu iliyoundwa.

“Issue ya Dk. Ulimboka imemweka pabaya afande Msangi, anaishi kwa hofu sana hadi kufikia hatua ya kupewa walinzi wawili,” kilieleza chanzo chetu cha habari.

Hata hivyo, pamoja na kukiri kusikia tuhuma hizo ambazo amezikana, Msangi ameliambia Tanzania Daima kuwa, yeye hana hofu kwa kuwa anajua hajafanya wala kuhusika kwa namna moja ama nyingine na tukio la Ulimboka.

Alikanusha kupewa ulinzi, ingawa Tanzania Daima lilishuhudia kwa siku mbili akiwa ameambatana na watu wengine wawili kila alipokwenda, ingawa alikiri kuwa ni askari wake na kwamba hilo ni jambo la kawaida.

Kwa mujibu wa kanuni za kazi za polisi, Kamanda wa Polisi wa mkoa ama wa Kanda Maalumu ndiye tu anayepewa ulinzi binafsi, lakini si mkuu wa upelelezi wa mkoa.

JK, serikali imtese Ulimboka kwa lipi?

Rais Jakaya Kikwete, ameeleza kushangazwa kwake na tuhuma zilizotolewa na baadhi ya madaktari na wana harakati kwamba serikali inahusika kumteka na kumpiga kikatili mwenyekiti wa jumuiya ya madaktari, Steven Ulimboka.

Katika hotuba yake jana kwa Watanzania, Kikwete pamoja na kuelezea masikitiko yake makubwa na kuhuzunishwa na kitendo cha kinyama alichofanyiwa Dk. Steven Ulimboka usiku wa Juni, 26, 2012, alidai kushangazwa na tuhuma kwamba serikali inahusika na ukatili huo, akisema haoni sababu ya msingi ya kufanya hivyo, ikizingatiwa kuwa ndiye aliyekuwa kiungo muhimu baina ya serikali na madaktari.

Kikwete alisema ingawa ni ukweli kwamba Dk. Ulimboka hakuwa mtumishi wa serikali, hivyo hakustahili kuwa sehemu ya majadiliano hayo na pia kulikuwa na rai ya kutaka asiwepo, bado ndiye aliyeamuru aachwe aendelee kuwapo maadam madaktari wenzake wamemuamini na anaweza kuwasemea vizuri zaidi kuliko wao wenyewe walioajiriwa na serikali.

Aliongeza kuwa kutokana na mwenendo wa mazungumzo ulivyokuwa ukiendelea, hakukuwa na sababu za serikali kufikia hatua ya kumdhuru Dk. Ulimboka.

“Kwa nini serikali imdhuru Dk. Ulimboka? Nimeelekeza vyombo vyetu vya ulinzi na usalama kufanya uchunguzi wa kina ili ukweli ujulikane. Nimesema kuwa ningependa ukweli huo ujulikane mapema ili tuondoe wingu baya la kutiliana shaka na kulaumiana kunakoendelea hivi sasa,” alisema.
Chanzo: Tanzania Daima

Alhaji Mwinyi: Mengi ana sifa kama za Mtume

 Rais mstaafu wa awamu ya pili, Alhaj Ali Hassan Mwinyi, amesema Mwenyekiti Mtendaji wa makampuni ya IPP Limited, Dk Reginald Mengi, ana sifa za kuitumikia jamii kama alivyokuwa Mtume Mohammed S.A W.

Amesema Mtume Mohamed S.A W alikuwa na sifa za kuwapenda na kuwashughulikia masikini na kuwasaidia wahitaji pasipo kujali tofauti zao.

“Umekuwa mstari wa mbele kuwasaidia masikini lakini hasa wenye ulemavu, unachanganyika na kula nao, hauwakimbii, unawaheshimu na kuumizwa na mapungufu ya maumbile yao, hauwabezi, hauwadharu,” Alhaj Mwinyi alisema.

Alhaj Mwinyi alisema hayo jana akihutubia kwenye hafla ya kumtunuku Dk Mengi, Tuzo ya Iliyotukuka ya Huduma kwa Jamii, iliyotolewa na Kamati ya Amani ya Viongozi Mkoa wa Dar es Salaam.

“Sifa hizo ndizo alikuwa Mtume Mohamed S.A W ambaye umma wa Waislamu unamheshimu,” alisema Alhaj Mwinyi ambaye hivi sasa ana miaka 87.

Aliongeza, “Waislamu wanavutiwa sana kwa tabia zako ndio maana tumeamua kukushukuru hadharani… tunamuomba Mwenyezi Mungu akuzidishie neema na rehema zake, akukinge na maadui na kukupa heri na fanaka.”

Alhaj Mwinyi alisema kutokana na hali hiyo, Kamati ya Amani ya Viongozi wa Dini iliamua kumtunukia zawadi ya dua ambayo haiwezi kushikwa ama kufanyiwa mzaha na binadamu yeyote, kwa maana matokeo yake yanatoka kwa Mungu.

 Mwenyekiti wa kamati hiyo, Alhad Mussa Salum, alisema hatua ya kumtunuku Dk Mengi tuzo hiyo, ilitokana na kujiridhisha na jitihada za Dk Mengi kwamba anastahili kutambuliwa na kuthaminiwa kwa michago yake kwenye jamii.

Salum alisema ukarimu wa Dk Mengi unamuwezesha kuitazama jamii pana zikiwemo taasisi za dini ambapo ameshashiriki kuichangia misikiti, makanisa na madrasa.

Alisema pamoja na kutambua uzito wa tuzo hiyo kuwa dua kama ilivyoelezwa na Alhaj Mwinyi, viongozi hao walikutana juzi na kuamua kutoa tuzo ambayo Alhaj Mwinyi alimkabidhi Dk Mengi.

Akizungumza baada ya kukabidhiwa tuzo hiyo, Dk Mengi alisema tukio hilo linapaswa kuwagusa watu wenye uwezo wanaofanya matendo ya huruma na kuwasaidia wahitaji.

Aliifananisha jamii ya watu wenye uwezo kiuchumi kuwa sawa na bomba la maji linalotumika kusafirisha bidhaa hiyo ili iufikie umma.

“Kama una uwezo kiuchumi ujue kwamba Mwenyezi Mungu amekuteua uwe kama bomba, ili hayo unayoyapata ukagawane na wasiokuwa na uwezo huo,” alisema.

Pia Dk Mengi alisema binafsi anatumia muda mwingi kufikiria na kutamani kama angeweza kuutokemeza umasikini na upungufu mwingine ili watu wanaoishi maisha magumu na yenye mateso wakombolewe na kuishi maisha bora.

Dk Mengi alisema nia ya kutokomeza umasikini nchini inapaswa iambatane na ukweli wa mapambano dhidi ya rushwa, ubadhirifu na utendaji usioridhisha wa viongozi wa umma.

“Haya yote ni baadhi ya vyanzo vikubwa vya umasikini na hali ngumu ya maisha kwa wananchi,” alisema.

Alisema wananchi wana imani na serikali ya Rais Jakaya Kikwete hasa kwa kuwachukulia hatua waliokuwa mawaziri, wakatajwa bungeni kwa ubadhirifu tofauti kwenye ripoti ya Mdhibiti na Mkaguzi Mkuu wa Hesabu za Serikali (CAG).

Dk Mengi alimpongeza Alhaji Mwinyi kwa jitihada zake zilizochochea umoja na mshikamano nchini, huku akifungua milango iliyofanikisha kukua kwa uchumi.

“Mwinyi ni mnyenyekevu asiyebagua yeyote na amekuwa ni rafiki wa kweli tangu akiwa kwenye madaraka ya urais na baada ya kustaafu,” alisema.

Chanzo: Nipashe Jumapili

Mkanda wa Ulimboka alivyotekwa, mwanzo- mwisho

"NI saa 12:45 asubuhi, bado kiza kimetanda katika eneo hili la Msitu wa  Mabwepande. Mbele yangu namwona mtu akiwa amekaa chini, pembeni ya barabara akiwa amelowa damu mwili mzima.

"Ninapomkaribia nasikia sauti ya mtu huyo ikisema kwa taabu; naomba msaada jamani… naomba msaada jamani, hivi ndivyo anavyoanza kusimulia Juma Mgaza Abdallah, mtu wa kwanza kumwona Mwenyekiti wa Jumuiya ya Madaktari Tanzania, Dk Steven Ulimboka baada ya kutekwa, kupigwa na kutupwa katika Msitu wa Mabwepande nje kidogo ya Jiji la Dar es Salaam.

Abdallah, anasema mara baada kumwona daktari huyo akiwa katika hali hiyo, alijaribu kumkokota kumtoa eneo hilo, lakini alishindwa kutokana na hali mbaya aliyokuwa nayo.

Baada ya hapo, aliamua kusubiri mtu mwingine apite eneo hilo ili amwombe wasaidiane kumpeleka Kituo cha Polisi Bunju.

Anasema muda mfupi baadaye aliona gari likija mbele yao, akalinyooshea  mkono kulisimamisha. Liliposimama, akamweleza dereva hali aliyokuwa nayo Dk Ulimboka na kwamba anahitaji msaada wa haraka.

Abdallah ambaye hadi wakati huo alikuwa hamfahamu mtu ambaye alikuwa akimsadia kuwa ni kiongozi wa madaktari kutokana na sura yake kuvimba, anasema walimwingiza katika gari hilo na kumpeleka Kituo Kidogo cha Polisi Bunju.

Anasema, Dk Ulimboka wakati huo alikuwa akiendelea kuvuja damu katika baadhi ya majeraha yake huku akiwa hana suruali na kubaki na bukta tu, huku akizungumza kwa taabu.

Kituo cha Polisi Bunju

Baada ya kumfikisha kituoni hapo, walitoa maelezo namna walivyomwokota na kumsaidia kumfikisha hapo.

Polisi baada kumhoji Dk Ulimboka, aliwatajia namba ya simu ya rafiki yake aitwaye Dk Deo. Walipompigia na kumweleza tatizo hilo, aliamua moja kwa moja kwenda Kituo cha Sheria na Haki za Binadamu, kutoa taarifa hizo na hatimaye kuandamana na watu kadhaa kutoka hapo akiwamo Mkurugenzi wake, Hellen-Kijo Bisimba.

Wawasili kituoni

Mratibu wa Mtandao wa Watetezi wa Haki za Binadamu Tanzania wa kituo hicho, Onesmo Olengurumwa, anasema waliwafika Polisi Bunju saa 3:36 asubuhi na kumkuta Dk Ulimboka akiwa amekalishwa kwenye benchi huku damu ikiwa imeganda kwenye majeraha mwilini.

Olengurumwa anasema waliwahoji polisi waliokuwa kituoni hapo kwa nini wakae na mtu aliyeumia kiasi hicho muda mrefu bila ya kuita gari la wagonjwa kumchukua ili kuwahi kupatiwa matibabu.

Olengurumwa anasema polisi walisema kwamba, walikuwa wanawasubiri ndugu zake wafike.

Baada ya muda mfupi, akiwa ameingizwa kwenye gari kupelekwa hospitali, Dk Ulimboka aliomba maji ya kunywa akisema ana kiu sana, lakini alipopewa, alikunywa kidogo akashindwa.

Anasema wakiwa njiani, alikuwa akilalamika kuwa anasikika maumivu makali huku akisisitiza kuwa tukio la kutekwa na kupigwa lilikuwa la kumuua.

"Jamani hawa watu walitaka kuniua walikuwa wamepanga kuniua," alisikika mara kwa mara akisema Dk Ulimboka wakati anapelekwa Hospitali ya Taifa ya Muhimbili kupatiwa matibabu.

Maelezo ya Dk Ulimboka

Baada ya Dk Ulimboka kuokotwa aliweza kuzungumza na kurekodiwa muda mfupi baada ya kutolewa msituni na mazungumzo yake yalikuwa hivi;

“Nilikamatwa na watu hao usiku wa Jumanne nikiwa maeneo ya Leaders Club, Kinondoni na daktari mwenzangu baada ya kupigiwa simu na mtu mmoja ambaye alidai kuwa anafanya kazi Ikulu.

“Kuna jamaa mmoja anafanya kazi Ikulu, kama siku tatu mfululizo alikuwa akitaka kukutana na mimi ila nilishindwa kukutana naye kwa kuwa nilikuwa na kazi nyingi na wakati mwingine mpaka usiku,” alisema Dk Ulimboka.

Huku akizungumza kwa taabu kutokana na mdomo wake kuvimba, alisema siku hiyo mtu huyo alimpigia tena simu na kumtaka wakutane.

“ Jana (Jumanne) alinipigia simu na nikamwambia daktari mwenzangu twende tukaonane naye, wakati huo alitueleza kuwa alikuwa maeneo ya Kinondoni Stereo,” alisema Ulimboka na kuongeza:

“Tulipofika maeneo hayo tukampigia simu na akatueleza kuwa alikwisha ondoka, baadaye tukamweleza sehemu tulipo mimi pamoja na mwenzangu.”

Alisema kuwa, wakati anakutana na mtu yule maeneo ya Leaders Club, hakuwa na amani.

“Kwa kweli siku ile nilivyoonana na mtu yule sikuwa na amani kabisa ya kukaa eneo lile,” alisema Dk Ulimboka.

Alisema kuwa wakati wakiendelea na maongezi ya kawaida, bado aliendelea kuwa na mashaka na mtu yule.

“Katikati ya maongezi nikaona ameanza kuzungumza na simu, kila tukitaka kuagana alikuwa akizungumza na simu, sijui nini kilikuwa kinachelewesha sisi kuagana,” alisema Dk Ulimboka na kuongeza:

“ Ghafla walitokea watu kama watano na kusema kuwa hawana tatizo na mtu yeyote katika eneo hilo isipokuwa mimi.
Wakati sijakaa sawa, waliniburuza hadi  barabara ya lami kwa kuwa eneo hilo lilikuwa karibu na barabara.”

Aliongeza, “Nilipowauliza wananipeleka wapi, wakaniambia kuwa mimi nasumbua sana na nitajua hukohuko, waliniingiza katika gari jeusi, lakini halikuwa na namba. Niliwauliza kosa gani nimefanya? Hawakunijibu kitu na kusema, we twende utajua hukohuko.’’

Alisema alipokuwa ndani ya gari hilo watu hao walimpiga na kwamba walipofika maeneo ya Victoria, walichukua sweta nyeusi na kumfunga usoni, jambo lililomfanya ashindwe kuona kinachoendelea ikiwa ni pamoja na alikokuwa akipelekwa.

“Walinipiga mateke ya mbavuni, wakati mwingine walitumia vitako vya bunduki,  kila nilipokuwa najaribu kuangalia ninapokwenda nilishindwa,” alisimulia  Dk Ulimboka.

Alisema kuwa watu hao walimpeleka katika nyumba moja ambayo hakujua iko sehemu gani ambapo walimshusha na kuanza kumshambulia kwa mateke mfululizo kila sehemu ya mwili. Wakati huo, wote walimshinikiza awaambie nani yupo nyuma ya mgomo wa madaktari.

“Tangu saa sita usiku mpaka saa 9:00 alfajiri walikuwa wananipiga tu, kuna wakati nilijaribu kukimbia wakapiga risasi juu nikasimama na sikuweza kukimbia tena,” alisema Dk Ulimboka na kuongeza:

“Nilisimama, wakaendelea kunipiga, niliwasikia wakisema ama wanichome sindano ya sumu nife au kunikanyaga na gari. Baadaye wakaanza kuning’oa  meno na kucha kwa kolea huku wakinilazimisha kusema nani yupo nyuma ya mgomo wa madaktari."

Alisema kuwa, watu hao walikuwa na bunduki kubwa ambayo hakuweza kuitambua ni aina gani.

“Waliniambia kuwa ninajua ninachokifanya hivyo wanaweza kunichoma sindano ya sumu nife au wanikanyage na gari nife,” alisimulia.

Dk Ulimboka alisema kuwa awali hakuwa na shaka na watu hao kwa kuwa alidhani ni polisi, lakini baadaye alishindwa kuwaelewa kwani watu hao walimchanganya.

“Sikuweza kuwatambua ila naweza kusema ni askari, walipokuwa wananipeleka niliwauliza mnanipeleka wapi na wakati huo nilikuwa sioni mbele ila ilikuwa kama maeneo ya Mwenge hivi,” alisema Dk Ulimboka.

Alisema kuwa baadaye alipoteza fahamu na hakuweza kuona chochote zaidi ya kusikia sauti za watu hao kwa mbali.

“Nilikuwa sioni na nilipoteza fahamu nikawa nasikia tu wakinibeba, gari lilitembea muda mrefu, sikujua ni wapi tunakwenda, kumbe ndio huko Mabwepande,” alisema.

Alisema kuwa walifika maeneo ya barabara ya vumbi na baadaye wakamshusha na kumbeba hadi msituni.

“Waliniburuza na kuniacha huko na muda wa  saa kumi alfajiri ndipo nikazinduka na kuanza kujiburuza kuelekea barabarani ambako nilisaidiwa na mtu mmoja ambaye simtambui,” alisema Dk Ulimboka.
Chanzo: Mwananchi

Hotuba ya Mhe. Rais Jakaya Mrisho Kikwete, June 30, 2012

 Ndugu Wananchi,

Kama ilivyo ada naomba nianze kwa kumshukuru Mwenyezi Mungu mwingi wa Rehma, kwa kutujaalia uzima na kutuwezesha kumaliza nusu ya kwanza ya mwaka 2012 salama.  Kwa kutumia utaratibu wetu wa kuzungumza nanyi kila mwisho wa mwezi, leo napenda kuzungumzia mambo mawili. Jambo la kwanza ni suala la usafirishaji haramu wa binadamu nchini na la pili ni la mgomo wa madaktari.  

Usafirishaji Haramu wa Binadamu Nchini

Ndugu Wananchi;

Bila ya shaka mtakuwa mmezisikia taarifa za tukio la kushtusha na kuhuzunisha la kukutwa maiti 43 za watu wasiojulikana, zilizotupwa katika kichaka kilichopo kijiji cha Chitego, Wilayani Kongwa, Mkoa wa Dodoma tarehe 26 Juni, 2012.  Pamoja na maiti hao, walipatikana watu 84 wakiwa hai lakini wote wakiwa wamedhoofu na baadhi yao wakiwa mahututi. 

 Hatua za haraka zilichukuliwa kuwasafirisha watu hao hadi Dodoma ambapo wale waliokuwa mahututi walifikishwa Hospitali Kuu ya Mkoa wa Dodoma kwa matibabu na wengine walihifadhiwa katika Kituo cha Kati cha Polisi, Dodoma.  Maiti 22 zilipelekwa Dodoma na 21 zilipelekwa Morogoro kuhifadhiwa.

Taarifa zilizopatikana kutoka kwa wale walionusurika zimebainisha kuwa watu hao ni raia wa Ethiopia ambao walikuwa safarini kwenda Malawi na baadaye Afrika ya Kusini ambako wangetengenezewa utaratibu wa kwenda kuishi Marekani na Ulaya. 

 Kwa mujibu wa maelezo yao, safari yao ilianza miezi mitano iliyopita.  Mwezi mmoja waliutumia Ethiopia na miezi minne waliitumia Kenya kabla ya kuletwa Arusha ambako walipakiwa kwenye lori na kuanza safari ya kuelekea Malawi lakini ikaishia Chitego.  Lori walilopanda lilikuwa limezibwa kabisa na hivyo kusababisha vifo kwa kukosa hewa.

Hotuba kamili ingia hapa

Morsi akabidhiwa madaraka na Tantawi

 Rais wa kwanza wa kiraia wa Misri, na kutoka chama cha Kiislamu, Mohammed Morsi, ameapishwa, na ametoa wito kuwa bunge la nchi lirejeshwe haraka - bunge lilofutwa hivi karibuni.

Katika sherehe kwenye eneo la jeshi nje ya Cairo, kiongozi wa wakuu wa jeshi wanaoongoza nchi, Field Marshal Mohammed Tantawi, alikabidhi madaraka rasmi kwa Rais Morsi.

Hapo awali, akitoa hotuba yake ya kwanza iliyogusia mambo mengi, katika Chuo Kikuu cha Cairo, Bwana Morsi alisema atalilinda jeshi kama taasisi, lakini piya alionya jeshi halifai kuwa mbadala wa matakwa ya wananchi.

Bwana Morsi aliahidi ukurasa mpya utaong'ara katika historia ya nchi, kufwatilia ule aliosema ni ukurasa wa kuchusha.

Alipokuwa akizungumza, akina mama ambao watoto wao waliuliwa chini ya utawala wa Rais Mubarak, walibeba juu picha za watoto wao hao wa kiume.

Bwana Morsi piya alisema Misri haitotapakaza mapinduzi nchi za nje.

Rais mpya aliapishwa kwenye sherehe iliyofanywa katika mahakama ya katiba mjini Cairo.
Chanzo: BBC

Daktari: Hali ya Ulimboka mbaya

 AFYA ya Mwenyekiti wa Jumuiya ya Madaktari Tanzania, Dk Steven Ulimboka imebadilika na kuwa mbaya, baada ya figo zake kushindwa kufanya kazi ya kuchuja sumu ya mwili na kusababisha apatiwe huduma ya kusafisha damu yake.

Habari zilizopatikana jana na kuthibitishwa na kiongozi wa jopo la madaktari wanaoendelea kumtibu, Profesa Joseph Kahamba, zilieleza kuwa hali ya Dk Ulimboka ilibadilika na kuwa mbaya na hivyo kuwapo mikakati wa madaktari wenzake kukusanya fedha ili kumpeleka nje ya nchi.

Dk Ulimboka ambaye amelazwa katika Kitengo cha Wagonjwa Wanaohitaji Uangalizi Maalumu (ICU) katika Taasisi ya Mifupa (MOI), alipatiwa huduma hiyo jana asubuhi kwa kutumia mashine maalumu, iliyoko katika Kitengo cha Watoto cha Hospitali ya Taifa Muhimbili (MNH).

Daktari huyo ambaye alikuwa anaratibu mgomo wa madaktari unaoendelea nchi nzima kutokana na Serikali kushindwa kutimiza madai yao mbalimbali, amelazwa kutokana na majereha aliyoyapata katika sehemu mbalimbali za mwili, baada ya kutekwa na watu wasiojulikana, kisha kupigwa, kung'olewa kucha, meno mawili na kutupwa katika Msitu wa Pande, usiku wa kuamkia Jumatano.

Tangu alazwe MOI baada ya kuokotwa na wasamalia wema, katika Msitu wa Pande uliopo nje kidogo ya Jiji la Dares Salaam, hali ya afya ya Dk Ulimboka imekuwa tete na jana ilizidi kuwa mbaya.

Kauli ya Dk Kahamba

Akizungumza na gazeti hili jana, Profesa Kahamba alisema kutokana na tatizo hilo, mgonjwa huyo jana alilazimika kusafishwa damu.

Alieleza hayo alipotakiwa kuthibitisha taarifa zilizolifikia gazeti hili kuwa afya ya Dk Ulimboka haikuwa nzuri na madaktari wanachangishana fedha kumpeleka kwenye matatibu ya kusafishwa damu katika Hospitali ya Regency jijini Dar es Salaam au nje ya nchi.

"Taarifa hizo zina ukweli, lakini siyo jambo rahisi kiasi hicho kwamba anatakiwa kusafishwa damu. Kama ni damu amesafishwa leo (jana) asubuhi katika Hospitali ya Taifa Muhimbili," alisema Profesa Kahamba na kuendelea:

"Suala lake ni complicated (tata) zaidi, lakini ili watu waelewe, siyo mbaya mkisema figo zimefeli(zimeshindwa kufanya kazi)."

Alipotakiwa kueleza sababu ya tatizo hilo, Profesa Kahamba alisema, "Siwezi kueleza kwa undani ila haya maumivu ya kupigwa na kuteswa yanachangia kwa kiasi kikubwa."

Alipotakiwa kueleza yeye anaonaje hali ya sasa ya Dk Ulimboka, Profesa Kahamba alisema: “Ni uongo tukisema anaendelea vizuri."

Aliendelea, "Unajua alipofikishwa hapa Muhimbili juzi (Jumatano) afya yake ilikuwa mbaya, na jana (Alhamisi) alionekana kuendelea vizuri, lakini jana hiyohiyo, hali yake ilianza kubadilika na vipimo vilionyesha kuwa ana complications (matatizo) za figo.

"Sasa figo ni kitu sensitive (muhimu) sana, anahitaji uangalizi wa karibu na kimsingi hatuwezi kusema kwamba anaendelea vizuri. Ni vyema tukisema tu afya yake ni mbaya," alieleza.

Taarifa za awali kutoka kwenye chanzo chetu hospitalini hapo, zilieleza kuwa Dk Ulimboka ambaye alipata tatizo linalojulikana kama “Acute renal failure”, alifanyiwa tiba inayojulikana kama Dialysis, ambayo ni kitendo kutumia mashine maalumu kufanya kazi ya kuchuja sumu ya mwili kwenda kwenye mkojo, baada ya figo ambazo hufanya kazi hiyo kushindwa.
Kwa mujibu wa chanzo hicho, Dialysis inaweza kumsadia mgonjwa ambaye figo zake zimeshindwa kufanya kazi, kuishi kama kawaida, lakini kwa Dk Ulimboka haikutoa matokeo mazuri.

Michango ya madaktari

Jana ulifanyika Mkutano wa Madaktari Bingwa wa MNH, Chuo Kikuu Sayansi ya Tiba Muhimbili (MUHAS) na Ocean Road (ORCI) na kuazimia kukusanya Dola za Marekani 40,000 (Sh64,000,000) ili Dk Ulimboka asafirishwe kwenda India kwa matibabu zaidi.

Taarifa za maazimio hayo zilitangazwa kwa waandishi wa habari na Katibu wa Jumuiya ya Madaktari, Dk Edwin Chitega, kuwa afya ya Dk Ulimboka haikuwa nzuri hivyo zikipatikana fedha hizo angepelekwa nje ya nchi.

Dk Chitega aliwataka wanataaluma hao na wananchi kwa ujumla kuchangia safari hiyo ili kuokoa maisha ya daktari huyo, huku akitaja namba za mawakala wa simu za Vodacom na Tigo, ambazo zitatumika kukusanya michango hiyo.

Habari zilizopatikana baadaye wakati tunakwenda mitamboni zilieleza kuwa, Dk Ulimboka alitarajiwa kusafirishwa kwenda Nairobi, Kenya kwa matibabu zaidi.


TANNA MOI watoa tamko
Katika hatua nyingine, Chama cha Wauguzi (Tanna), Tawi la MOI kilitoa tamko la kulaani kitendo cha kutekwa, kupigwa na kujeruhiwa kwa Dk Ulimboka na kutaka uchunguzi wa kina na haraka ufanyike ili kubaini watu waliohusika.

Mwenyekiti wa Tanna, Tawi la Moi, Prisca Tarimo alisema katika tamko hilo kuwa, kitendo alichofanyiwa Dk Ulimboka ni cha kinyama na kisicho cha kiutu.

Katika tamko hilo, Tanna imeomba Serikali kutafuta suluhu ya mgomo huo haraka kwa kuwa unaathiri maisha ya watu na kuwaongezea mzigo wa kiutendaji wauguzi.

Mgomo wa madakati unaingia siku ya saba leo, huku suluhu ya kuaminika ya kutatua tatizo hilo, ikiwa bado haijapatikana.

Polisi wakanusha
Katika hatua nyingine, James Magai anaripoti kuwa, Jeshi la Polisi limekanusha kumteka na kumjeruhi Dk Ulimboka, huku likipinga pia taarifa za daktari huyo kumtambua mmoja wa askari walio katika jopo la uchunguzi wa tukilo hilo alipokwenda kumtembelea hospitalini.

Pia jeshi hilo limetoa wito kwa madaktari hao walioko katika mgomo kuwa na busara na kutii amri ya Mahakama, ya kuwataka wasitishe mgomo wao.

Pia limeonya kuwa ikiwa wataendelea kukaidi na kupuuza amri ya hiyo ya mahakama, linao wajibu wa kuwachukulia hatua kwa kuwafikisha mahakamani, ili wajibu mashtaka hayo.

Msimamo huo ulitolewa jana na Kamishna wa Oparesheni Maalumu, Kamishna wa Polisi (CP), Paul Chagonja wakati akijibu maswali ya waandishi wa habari kwenye mkutano alioitisha kuzungumzia matokeo ya operesheni ya jeshi hilo ya majuma matatu katika kuzuia uhalifu nchini.

Alisema madai hayo ni uvumi ambao unalenga kulifanya jeshi hilo lisiaminike na kufifisha juhudi zake za kuwasaka waliohusika na unyama huo.
Chanzo: Mwananchi

Dkt. Ulimboka akiwa Hospitalini

Source: Wavuti

Madaktari 72 watimuliwa kazi Mbeya

 BODI ya Hospitali ya Rufaa ya Mkoa wa Mbeya, imewasimamisha kazi
madaktari 72 kwa kosa la kutoingia kazini kwa siku tano jambo ambalo
ni kinyume cha makubaliano ya mkataba.

Imeelezwa kuwa madaktari hao ambao 54 ni wale wa mafunzo ambao
waliingia mkataba wa miaka miwili na hospitali ya Rufaa na madaktari
18 ni wale walioajiriwa na Wizara ya afya.

Akizungumza na waandishi wa habari, Mwenyekiti wa Bodi Kaimu Mkuu wa
Mkoa wa Mbeya Norman Sigara, alisema kitendo cha madaktari kutoripoti
kazini kwa siku tano ni ukiukwaji wa kanuni za utumisha wa umma toleo
la 2009 kifungu namba F.16-F17 na F. 27.

"Hivyo kupitia kanuni hiyo madaktari hao wamesimamishwa kazi na
kurudishwa kwa mwajiri wao ambaye ni Katibu Mkuu Wizara ya Afya na
Ustawi wa Jamii kwa hatua zaidi za kinidhamu,"alisema Sigara.
Kwa mujibu wa Mwenyekiti huyo wa Bodi, imeelezwa kuwa siku ya tarehe
23/6/2012 wafanyakazi 15 waliokuwa zamu(Intern Doctors 12 na
Registrars3) hawakufika kazini na tarehe 24/6/2012 wafanyakazi
19(Intern doctors 15 na Registrars 4) hawakufika kazini.

Alisema, kuanzia tarehe 25/6/2012 hadi leo imethibitika kuwa Interns
doctor 54 na Registrars 18 hawakufika kazini hadi leo tarehe 28/6/2012
ambapo tarehe 25/6/2012 bodi ya hospitali ilifanya kikao cha dharura
kujadili hali ya utendaji kazi na utoaji huduma hospitalini na kutoa
uamuzi.

Sigara, aliyataja maamuzi hayo kuwa ni Mwenyekiti wa Bodi akutane na
madaktari ambao hawakufika kazini ili awasikilize sababu za kutofika
na kujadili namna ya kumaliza matatizo hayo jambo ambalo madaktari hao
waligoma.

Alisema, baada ya madaktari hao kukaidi ombi hilo, Bodi ya hospitali
ili waandikia barua za kujieleza kwanini wasichukuliwe hatua za
kinidhamu kwa kuvunja mkataba walioingia na hospitali na pia kukiuka
kanuni za kudumu za utumishi wa umma nalo walilikaidi

"Iwapo madaktari ambao hawakuripoti au kueleza sababu za kuridhisha
ifikapo tarehe 28/6/2012. Kwa kuzingatia kanuni za utumishi wa Umma,
madaktari hao watasimamishwa kazi na kurudishwa kwa mwajiri wao ambaye
ni Katibu Mkuu Wizara ya Afya na Ustawi wa Jamii,"alisema.

Aidha, alisema kuwa kwa ujumala madaktari hao waligomea barua zote
mbili yaani ya kuitwa kwenye kikao pamoja na ile ya kuwataka kujieleza
hivyo Bodi imechukua hatua za kisheria za kuwafukuza kazi.

Hata hivyo Mwenyekiti huyo wa bodi, alisema kuwa tayari hospitali ya
Rufaa kwa ushirikiano wa Mkurugenzi wa Jiji la Mbeya, madaktari watano
wamepatikana ili kusaidia huduma kwa hospitali hiyo.
Chanzo: Mbeya Yetu

Dk. Mwakyembe afanya ziara ya kushitukiza Msamvu

 WAZIRI wa Uchukuzi, Dk. Harrison Mwakyembe, amefanya ziara ya kushitukiza katika Kituo cha Mabasi cha Msamvu, Manispaa ya Morogoro na kufanya ukaguzi wa mabasi ya abiria yaendayo mikoani.

Katika ukaguzi huo, mabasi matatu aliyaamrisha yalipe faini ya Sh 250,000 kila moja, kutokana na makosa mbalimbali, likiwamo la kutokuwa na dereva wa akiba.

Ziara hiyo aliifanya mapema wiki hii asubuhi, kwa kushirikiana na maofisa wa Mamlaka ya Udhibiti wa Usafiri wa Nchi Kavu na Majini (SUMATRA) na lengo lake ni kukagua mabasi yanayofanya safari za mikoani na nje ya nchi na kuona kama yanakidhi vigezo katika shughuli ya kusafirisha abiria.

Katika ziara hiyo, Dk. Mwakyembe, alifika katika kituo hicho cha mabasi na kuegesha gari lake mbali kidogo, kisha kuelekea katika mabasi huku akiwa kama abiria na kuingia ndani ya mabasi hayo kisha kuanza kukagua leseni za madereva na vitambulisho vya kampuni za mabasi wanavyotumia madereva.

Ukaguzi mwingine alioufanya ni ratiba za safari pamoja na usalama wa mabasi na baadaye aliamrisha madereva walioonekana kuwa na makosa kulipa faini.

Mabasi yaliyolipishwa faini ni pamoja na Royal Coach linalofanya safari zake kutoka Dar es Salaam kuelekea Bukoba, ambalo dereva wake hakuwa na kitambulisho cha kampuni, basi la Super Najimunisa na Muro Investment yanayofanya safari zake Dar es Salaam kuelekea Mwanza ambayo yalikuwa na kosa la kutokuwa na dereva wa akiba.

Baada ya kubaini makosa hayo, aliwataka madereva ambao walionekana kuwa na makosa kulipa faini ya papo hapo, vinginevyo aliwataka SUMATRA kuwafikisha mahakamani, hata hivyo, madereva hao walikubali kulipa faini hiyo baada ya kuwasiliana na wamiliki wa mabasi wanayofanyia kazi.

Akizungumza na maofisa wa SUMATRA na madereva, alisema makosa kama hayo yanaweza kusababisha ajali za barabara na hivyo kupoteza maisha ya watu, vilema vya kudumu na uharibifu wa mali na ataendelea kufanya ziara za namna hiyo mara kwa mara kwa ajili ya kubaini makosa mengine.

Aidha, aliwataka SUMATRA na kikosi cha usalama barabarani kusimamia sheria za usalama barabarani na kutowaonea aibu madereva watakaoonekana kuwa na makosa, kwa kuwa kufanya hivyo kutasaidia kupunguza ajali ambazo ni tishio hapa nchini.

Kwa upande wake, Mkuu wa Usalama Barabarani mkoani hapa, Leonard Gyindo, alisema Kikosi cha Usalama Barabarani kimejipanga kudhibiti ajali za barabarani kwa kufanya ukaguzi kabla ya gari halijaondoka katika kituo hicho na kwa madereva wenye makosa wamekuwa wakilipishwa faini ya papo hapo na wengine kufikishwa mahakamani.

Hata hivyo, alimpongeza Dk. Mwakyembe kwa jitihada zake katika kusimamia sheria, hasa za usalama barabarani na kuahidi kuwa kikosi hicho kitampa ushirikiano na kutekeleza maagizo yote atakayotoa.
Chanzo: Mtanzania

Lowassa, Zitto wamtega JK

 NAIBU Kiongozi wa Kambi ya Upinzani Bungeni, Zitto Kabwe, ameitaka serikali ya Rais Jakaya Kikwete kuwachunguza na kuwachukulia hatua zikiwemo kuwataja, kuwashtaki na kuwafilisi mafisadi wanaodaiwa kupora fedha za miradi ya gesi, madini na petroli na kuzihifadhi kwenye akaunti nchini Uswisi.

Aliyasema hayo bungeni jana wakati akichangia hotuba ya bajeti ya Ofisi ya Waziri Mkuu, Bunge na Tawala za Mikoa na Serikali za Mitaa (Tamisemi) na kuongeza kuwa kuna wizi wa fedha za serikali zaidi ya sh bilioni 300 ambazo baadhi ya watumishi wa serikali wamepewa kama hongo na wawekezaji wa sekta hiyo.

Wakati Zitto akisema hayo, Waziri Mkuu wa zamani ambaye pia ni Mwenyekiti wa Kamati ya Bunge ya Ulinzi, Mambo ya Nje na Usalama, Edward Lowassa, ameitaka serikali kutolea maelezo madai ya kufichwa kwa shilingi bilioni 300 katika benki mbali mbali nchini Uswisi ambazo zinadaiwa kuwekwa na wanasiasa na watu wa kada mbalimbali nchini.

Akizungumza Bungeni jana Zitto aliitaka Ofisi ya Waziri Mkuu, vyombo vya usalama na Taasisi ya Kupambana na Kuzuia Rushwa (Takukuru) kuchunguza na kuchukua hatua mara moja.

Zitto aliitaka serikali kuiga mfano wa India ambayo ilipata mkasa kama huo na kuwataja watuhumiwa, kuwachunguza na kuzirudisha serikalini pesa zilizoonekana kuwa zilipatikana kinyume cha sheria.

Alitaka serikali ihakikishe kuwa watuhumiwa hao wanatajwa, wanachukuliwa hatua na pesa zinarudishwa nchini huku akionya kuwa inashangaza hata kabla ya miradi kuanza watu wameanza ufisadi na kupora mali za umma.

Gazeti la The Guardian la Jumamosi iliyopita lilichapisha taarifa za ufisadi huo uliofanywa na Watanzania sita waliopokea hongo kutoka makampuni yanayotafiti gesi, madini na petroli na kuweka pesa zao Uswisi.

Kwa upande wake Lowassa alitoa kauli hiyo jana wakati akijibu maswali ya waandishi wa habari waliotaka kujua msimamo wa kamati ya ulinzi na usalama juu ya kuwepo kwa fedha hizo katika mabenki hayo ya Uswisi huku Watanzania wakiendelea kutaabika kwa mfumko mkubwa wa bei.

Akizungumzia kuhusu hilo, Lowassa ambaye hakutaka kuzungumzia kwa kirefu alisema hata wao kama kamati wamesoma taarifa hizo kwenye magazeti na kwamba wenye majibu mazuri kuhusiana na suala hilo ni serikali.

Hoja ya Zitto
Aidha Zitto katika hoja yake hiyo pia akizungumzia mjadala wa mafuta na gesi alishauri suala hilo lisiwe la Muungano kila upande uachiwe jukumu la kutafuta na kuchimba nishati hizo.
“Kila upande wa Muungano ushughulikie gesi na mafuta yake hakuna sababu ya kuchelewesha suala hili,” alisema.

Akiunga mkono hatua hiyo mbunge wa Nkasi Kaskazini (CCM), Ally Kessy, aliitaka serikali kutoa maelezo ya hatua zilizochukuliwa dhidi ya Watanzania walioingia mikataba ya rada.

Alisema Waingereza waliwashtaki watuhumiwa wake na kurudisha fedha ya rada kwa Tanzania na kuhoji serikali nayo imefanya nini kwa watuhumiwa walioingia mikataba mibovu ya rada humu nchini?
Alitaka waliofilisi mashirika ya umma kama Shirika la Ndege –ATC, Reli na Bandari wakamatwe, washtakiwe, kufilisiwa na kunyongwa hata kama walifanya hivyo miaka 20 iliyopita.

Aliliambia Bunge kuwa hata kama walioua mashirika wamekufa pingu zipelekwe kwenye makaburi yao na kusisitiza kuwa dawa ya walioua mashiriki ya umma ni kuuawa.

Alipendekeza wauliwe kwani wamewaua Watanzania kwa kuwaibia stahili zao kama dawa zilizokuwa ziwatibu na kusababisha vifo vyao.

Aliongeza kuwa sheria za Tanzania ni mbaya kwani zinawalinda wezi na kuwatetea mafisadi na kuiponda serikali kuwa ina masikio lakini haisikii ina pua lakini hainusi.
Aliishangaa miradi ya usafiri jijini Dar es Salaam iliyotangazwa na Waziri wa Ujenzi Dk. John Magufuli ya kujenga vituo saba vya usafiri wa boti kutoka Bagamoyo hadi Feri na kusema huo ni ubadhirifu wa fedha za umma.

Aliitaka serikali kuwashughulikia watuhumiwa wanaodaiwa kuhifadhi fedha za rushwa ya gesi na petroli kwenye benki za Uswisi na yenyewe kukaa kimya.
Aliongeza kuwa Takukuru imeshindwa kazi na inashangaza kuona kuwa inawaambia wananchi wawaletee majina ya wala rushwa wakati wanawajua na watu wanaiba fedha za umma na kujenga maghorofa na kumiliki mali za wizi.

Alisema maofisa wa Takukuru wanawachuuza wananchi wanaowapa majina ya wala rushwa kwa kutoa taarifa kwa watuhumiwa waliotajwa kisha kuwaomba rushwa.
Alikataa kuunga mkono bajeti ya Ofisi ya Waziri Mkuu kwa maelezo kuwa inaifanya mikoa mingine kuwa peponi na mingine kuwa motoni.

Nacho Chama cha Demokrasia na Maendeleo (CHADEMA) kupitia taarifa yake kilirudia kutoa wito kwa Rais Kikwete kutumia mamlaka yake ya kikatiba kuagiza kukamatwa kwa watuhumiwa wote wa ufisadi wa rada ambao iliwataja kwa nyakati mbalimbali ikiwemo katika orodha ya mafisadi (list of shame) Septemba 15 2007 katika Uwanja wa Mwembeyanga.

Katika taarifa iliyotolewa kwenye vyombo vya habari na kusainiwa na Mkurugenzi wa Mambo ya Habari wa CHADEMA, John Mnyika, alisema kutokana na sheria za usiri za Uswisi, wanaitaka serikali inayoongozwa na CCM kuwasiliana na serikali ya nchi hiyo ili kuanza mchakato wa kuwezesha mahakama za nchi hiyo kutoa ruhusa kutolewa kwa taarifa zote kuhusu wenye akaunti hizo na makampuni yaliyoweka kiasi hicho cha fedha ili hatua zaidi ziweze kuchukuliwa kwa mujibu wa Sheria za Tanzania na Sheria za Kimataifa.

“CHADEMA inatambua kwamba kuachwa kwa mafisadi bila kuchukuliwa hatua kamili za kisheria na mali zao kufilisiwa kunafanya taifa kuendelea na ufisadi ikiwemo ule wa Akaunti ya Madeni ya Nje (EPA), Richmond na sasa tuhuma mpya za ufisadi kwamba kuna vigogo wenye kiasi cha bilioni 303 kwenye akaunti Uswisi ambazo zinadaiwa kuwekwa na makampuni ya madini, mafuta na gesi asili,” ilieleza sehemu ya taarifa hiyo.

Aidha chama hicho kimekumbusha kuwa katika orodha yake ya mafisadi iliwataja pia kwa majina viongozi wa serikali ambao waliingia mikataba ya kifisadi ya madini na rasilimali nyingine za taifa kutolewa kwa taarifa hizo za benki za nje kutathibitisha ukweli na pia kubainisha watuhumiwa wengine zaidi.

Pamoja na hilo imeitaka serikali inayoongozwa na CCM kuzingatia mpango kati yake na serikali ya Uingereza kupanga matumizi ya fedha kiasi cha shilingi bilioni 72.3 za rada zilizorejeshwa baada ya kubainika zilizochotwa kifisadi na kampuni ya BAE Systems ya Uingereza.

Wakati huohuo, CHADEMA imeshangazwa na uamuzi wa serikali inayoongozwa na CCM kubadilisha mpango wa kujenga nyumba za walimu kinyume na mpango huo wakati huu ambapo serikali iko katika mgogoro na walimu kutokana na kutowatimizia madai yao ya msingi ikiwemo nyongeza ya mishahara, kulipa madeni na kupunguza kodi kwenye mishahara.

Chama hicho kimeitaka serikali kukumbuka kwamba mpango huo ulikuwa moja ya ushahidi muhimu uliotolewa mahakamani kumshawishi jaji kutoa uamuzi wa kuridhia makubaliano kati ya SFO na BAE kwamba fedha hizo zingetumika kununua vitabu 4.4 milioni kwa ajili ya wanafunzi, vitabu 192,000 Kwa ajili ya walimu kufundishia, madawati 200,000, kujenga nyumba 1,196 za walimu wa shule za msingi vijijini, kujenga vyoo 200,000 kwenye shule za msingi.

Kadhalika imeonyesha kuguswa na taarifa kwamba zabuni ya kuchapa vitabu hivyo imetolewa kwa kampuni ya Kiingereza ya Oxford University Press hali ambayo itafanya sehemu kubwa ya fedha hizo kurejea hukohuko Uingereza.
Chanzo: Tanzania Daima

Dr Ulimboka azungumza kilichompata

Mwenyekiti wa Jumuiya ya Madaktari nchini Dk Stephen Ulimboka, amepigwa na kujeruhiwa vibaya na watu wasiofahamika.

Dkt Ulimboka anadaiwa kuvunjwa mbavu, miguu yote miwili, kung’olewa meno yote ya mbele na kuumizwa vibaya katika sehemu mbalimbali za mwili wake.

Tukio hilo la kikatili na kusikitisha limetokea usiku wa kuamkia leo jijini Dar es Salaam, na linadaiwa kufanywa na watu wa sio julikana ambapo kabla ya kufanya unyama huo walidaiwa kumteka na kumpiga kabla ya kumtelekeza katika eneo la msitu wa Pande Mabwepande.

DKT. ULIMBOKA ASIMULIA TUKIO

Akisumulia tukio hilo Dkt Ulimboka alisema kuwa  jana usiku alipigiwa simu na mtu aliyejitambulusha kwake kuwa anaitwa Hemed, aliyemwambia kuwa anahitaji kuongea naye, na ndipo walipopanga kuonana katika eneo la Leaders Kinondoni.

Dk Ulimboka aliyekuwa akiongea kwa tabu, aliendelea kusimulia kuwa wakati akiongea na mtu huyo anayekiri kuwa alikuwa akifahamiana naye kabla, alikuwa na wasiwasi kwani kila mara alikuwa akipokea simu na kuwasiliana na watu wengine ambao hawakuwapo eneo hilo.

Alisema baada ya muda alishangaa kuona wanaongezeka watu wengine watano wakiwa na silaha, kisha wakamwambia kuwa anahitajika kituo cha Polisi na kumvuta na kumuangusha barabarani kabla ya kumuingiza katika gari lenye rangi nyeusi na kuondoka naye.

Dkt Ulimboka alisema kuwa wakiwa njiani walimpiga, na kumfikisha katika msitu huo wa pande na kuendelea kumpiga paka alipoteza fahamu.

MADAKTARI NAO WALONGA

Akisimulia mkasa huo mmoja wa madaktari wenzie aliyefahamika kwa jina moja la Dkt Deo, alisema kuwa alipigiwa simu na mtu hasiyemfahamu na kumfahamisha tukio hilo.

Alisema alipofika katika kituo cha Polisi cha Bunju, alimkuta akiwa katika hali mbaya na ilikuwa ngumu kumtambua kwakuwa alikuwa na majeraha mengi eneo la usoni.

Aliongeza kuwa akiwa na wenzie waliamua kumchukua na kumkimbiza katika Hospitali ya Taifa Muhimbili kwaajili ya matibabu.

"Hali yake kwakweli ni mbaya sana, amepigwa mno na ameumizwa kwakweli tumemleta hapa hili aweze kupata matibabu, lakini mimi nilivyomkuta mara ya kwanza nilishindwa hata kumtambua kwa jinsi alivyokuwa ameumizwa"alisema Dkt Deo

Alisema kuwa alisimuliwa na Dkt Ulimboka kwamba watu hao waliomteka na kumpiga walikuwa na silaha na kwamba alishindwa kuwatambua.

Aliongeza kuwa Dkt Ulimboka alidai kuwa wakati akiwa katika halimbaya alikuwa akisikia mazungumzo yao, wakibishana juu ya kumuua wengine wakisisitiza achomwe sindano, na wengine wakitaka kumpiga risasi.

Alisema wakati mabishano yakiendelea kati yao, Dkt Ulimboka aliinuka akiwa na lengo la kukimbia lakini watu hao walipiga risasi hewani iliyomshtua na kuangua chini.

Kwa upande wake Dkt Cathbeth Mcharo ambaye ndiye aliyempokea Dkt Ulimboka Hospitalini hapo, alisema kuwa hali yake ni mbaya na kwamba wanajitahidi kumpatia huduma za haraka.

Alisema kuwa kwa hatua za awali amefanyiwa vipimo mbalimbali, hili iweze kufahamika aina ya matibabu anayotakiwa kupatiwa.

POLISI

Kamanda wa polisi Kanda Maalum ya Dar es salaam Kamanda Suleiman Kova amezungumza na waandishi wa habari kuhusu tukio hilo la utekaji nyara na kujeruhi lililompata kiongozi mgomo wa Madaktari Steven Ulimboka anayedaiwa kutekwa na watu watano wakati akipata kinwaji katika klabu ya Leaders Kiondoni jijini Dar es salaam.

Kamanda Kova amesema Ulimboka aliokotwa na msamaria mwema ambaye hakutaka kumtaja jina lake kiusalama na kutoharibu upelelezi kuwa msamaria mwema huyo alimuokota Ulimboka katika msitu wa Mabwepande na kutoa taarifa kituo cha polisi cha Bunju, ambapo polisi aliyekuwa zamu alichukua maelezo yake na baadae Steven Ulimboka kuletwa katika hospitali ya taifa ya Muhimbili kwa matibabu zaidi.

Kamanda Kova amesema jeshi la Polisi Kanda Maalum limeunda jopo maalum kwa ajili ya uchunguzi na upelelezi wa tukio hilo la utekaji nyara, kwani ni tukio la kwanza kutoke nchini, ameongeza kwamba wahusika wote watakaobainika kuhusika na tukio hilo wachukuliwa hatua za kisheria na sheria itafuata mkondo wake ili kukomesha matukio mengine kama hayo

MUHIMBILI

Wakati hayo yakitokea inadaiwa kuwa Askari Kanzu mmoja alikumbana na kipigo kikali kutoka kwa madaktari hapo Muhimbili kwa kile kilochodaiwa kutambuliwa na Dkt Ulimboka kuwa mmoja wa watu walio mjeruhi.

Pia inadaiwa kuwa Askari huyo aliingia chooni na kufanya mawasiliano na wenzake huku Madaktari hao wakimsikiliza na kutokana na alichokua akiongea chooni humo ndipo alipotoka aliambulia kichapo kikali.

Pia baadhi ya madkatari na wauguzi walikuwa wakisukuma gari alilokuwa amepanda Dkt Ulimboka huku wakiimba nyimbo za Umoja na Mshikamano Daima miongoni mwao.

Hali ya ulinzi ilikuwa kali Hospitalini hapo kwani Picha zilikuwa haziruhusiwi kupigwa.
Chanzo: Father Kidevu